![आर.आर. चौलागाईं आर.आर. चौलागाईं](https://www.fitkauli.com/wp-content/themes/fitkauli_theme/images/author2.png)
किनकि तिमी नेता
म जाबो एउटा तुच्छ रैतीले के भन्न सकुँला र ! तिम्रो बारेमा जति बोलेपनि थोरै हुन्छ तिम्रो बारेमा जति लेखेपनि थोरै हुन्छ तिमी फोहरको थुप्रो तिमी कुहिएको फर्सी तिमी घाउको पिलो तिमी म्याद सिद्धिएको औषधि किनकि तिमी नेता ।
![image image](https://www.fitkauli.com/wp-content/uploads/2021/12/rr-chaulagai.jpg)
आर. आर. चौलागाईं :
कुनै सपना छैन
कुनै योजना छैन
कुनै लक्ष छैन
कुनै गन्तव्य छैन
किनकि तिमी नेता ।
शहीदको रगत पिएर
तिमी बाँचिरहेका छौ
जनताको पसिना पिएर
तिमी बाँचिरहेका छौ
युवाहरूलाई खाडीमा बेचेर
तिमी बाँचिरहेका छौ
महिलाहरूलाई बम्बईमा बेचेर
तिमी बाँचिरहेका छौ
किनकि तिमी नेता ।
साम्राज्यवादीहरूले आँखा तर्दा
तिमी सुरुवालमा मुत्छौ
विस्तारवादीहरूले हाच्छ्यूँ गर्दा
तिमी सुरुवालमा मुत्छौ
प्रतिकृयावादीहरूले ख्वाक्क खोक्दा
तिमी सुरुवालमा मुत्छौ
दलाल पुँजिपतिहरूले पाध्दा
तिमी सुरुवालमा मुत्छौ
किनकि तिमी नेता ।
तिमी मान्छे मारेर आजीवन जेल परेका
हत्याराहरूलाई आममाफी दिन्छौ
तिमी निर्मला पन्तका अपराधीहरूको
प्रमाण नष्ट गर्छौ र उनीहरूलाई संरक्षण दिन्छौ
तिमी देशद्रोही, जनविरोधी, भ्रष्टाचारी
र विचौलियाहरूको घेरामा बस्छौ
र उनीहरूको सल्लाहमा चल्छौ
किनकि तिमी नेता ।
तिमी कामको नाममा एउटा सिन्को पनि भाँच्दैनौ
तिमी कामको नाममा एउटा ढलेको गिलास पनि उठाउँदैनौ
बरु पटक पटक सरकार बनाउँछौ/ढाल्छौ
बरु पटक पटक पार्टी एकता गर्छौ/फुटाउँछौ
आफ्नो निजी आलिशान महल बनाउनु
तिम्रो लागि नौलो जनवाद हो
आफ्ना गर्ल फ्रेन्डहरूलाई सांसद र मन्त्री बनाउनु
तिम्रो लागि समाजवाद हो
निजी जमीन जोड्नु
ब्याङ्क ब्यालेन्स बढाउनु
र सुन थुपार्नु तिम्रो लागि साम्यवाद हो
रुखो बोल्छौ
गजक्क पर्छौ
श्रमजीवी जनतालाई हेप्छौ
हामीजस्ता कविहरूको खेदो खन्छौ
किनकि तिमी नेता ।
तिम्रो महिमा हज्जार जिब्रा भएका
शेषनागहरूले पनि बताउन सक्दैनन्
कुनै पनि हैसियत नभएको
म जाबो एउटा तुच्छ रैतीले के भन्न सकुँला र !
तिम्रो बारेमा जति बोलेपनि थोरै हुन्छ
तिम्रो बारेमा जति लेखेपनि थोरै हुन्छ
तिमी फोहरको थुप्रो
तिमी कुहिएको फर्सी
तिमी घाउको पिलो
तिमी म्याद सिद्धिएको औषधि
किनकि तिमी नेता ।
०००
२०८० कार्तिक १४