नेपाली हास्यव्यङ्ग्य अनलाइन पत्रिका

कलानिधि दाहाल :

कहाली
होहल्ला
खैलाबैला
अशान्त
निरङ्कुश सिँहको
अनायास आक्रमण
हुँडारहाइनाहरूको चिच्याहट
चौतर्फ
स्यालगिध्दका चुचा उचालिएर
रगतको छिटाबाछिटामा
निरीह चीत्कार
रगतकै आहालभित्र
सिँह बाघ चितुवाको सत्ता
हरेक सीमाभित्र
आततायी गिध्दहरू
हाइनाहरू
हुँडारहरू
जिब्रा निकालेर रगतमा
नङ्ग्रा तेर्स्याएर
मृगबस्तीमा
बचेरागुँडमा
सर्वत्र हाहाकार फैलिएको
झाङ्गिएको
हुर्किएको
र फुर्किएको
यमदरबारसँग
तिखा तरबारका
बन्दुक निशानामा
नालनिशानामा
लम्पसार सुतेको छ
वर्तमान मेरो विश्व !
स्वाभिमान निचोरेर
स्वअस्तित्व थिचेर
एक थोपो रगतको लोभमा
एक परिवार
भुँडीको डकारमा
उचालेर आकाशबाट
क्षेप्यास्त्रका ज्वालाहरू
पोलेर जमिन
जमिनभित्रको ज्वालामुखीले
अर्को निरङ्कुशता
रोकेर हरितगृहका
नसानसामा
विषबमनको
क्षारसमुद्र फैलिरहेछ
वर्तमान मेरो विश्व !!

०००
कलेकुटी, काठमाडाैं