नेपाली हास्यव्यङ्ग्य अनलाइन पत्रिका

भगवतीप्रसाद शर्मा :

लाखौं छन् छवि सप्रेका अरूले परिचालित
तिनै गोटी बनेका छन् पार्छन् देश विभाजित ।

बङ्गलादेश पारेर आफ्नो दुनु मिलाउने
अनेकौं रूपका मान्छे सिद्धि आफ्नो गराउने ।

नयाँ विद्रोह ल्याएर नेपाल परनिर्भर-
पार्न तयार गर्दैछन् बिकेका तुच्छ तस्कर

अप्नाऊँ होशियारी है नेपाल लुप्त पार्दछन्
जनता जनता भन्दै सोझालाई भिडाउँछन् ।

विद्रोह चाह राखेर आउँदै आउँदै न त
विना सिद्धान्तको मान्छे हुँदैन चेतना अतः ।

उक्साहट कतैबाट बिगारौँ कसरी घर
छद्मभेष गरी आए विदेशी तुच्छ नोकर ।

छद्म विद्रोह धेरै भो आफन्तमा लडाउन
अब ता त्यसरी हुन्न त्यो उपयुक्त होइन ।

चिनौँ है शत्रुको हात छाम्दा लाग्छ मुलायम
जनता पछि पारेर चल्दैन उसको दम ।

अनेकौं बहाना गर्छन् भ्रष्टाचार हटाउन
भ्रष्टाचारी तिनै आफू पर्दा पछाडि छन् किन !?

बोलेर मात्र टार्दैछन् अनेक पातकीहरू
रोगी देश बनाएर मार्दैछन् दौँतरी अरू ।

न्याय समाप्त पारेर मतियार बढाउने
सेना समाप्त पारेर हतियार बनाउने ।

थोत्रो गाडी चलाएर यात्रा गर्न लगाउने
सतर्क नबने देखि देश आगो लगाउने ।

तम्तयारी छ है साथी जनता नै लडाउँने
शत्रुलाई चिनौँ साथी भाइ भाइ भिडाउँने ।

विना सिद्धान्तको बाटो अँध्यारो हुन्छ आखिर
चिनौँ है पहिलो शत्रु हामीलाई लडाउँने ।

०००
खोटाङ