नेपाली हास्यव्यङ्ग्य अनलाइन पत्रिका

रूद्र ज्ञवाली :

१. मनलाई जोख्न नाप्न मिल्ने तराजु हुँदैन ढक हुँदैन
मन तानिने मनले हो मनलाई तान्ने चुम्बक हुँदैन
कुरा काट्दैमा पिठपछि किन प्रतिवाद प्रतिरक्षा गरूँ
स्यालजस्तै सिँह पनि हुइँया गरोस् आवश्यक हुँदैन ।

२. अस्पताल गइन्छ झारफुक या लामा धामी गरिदैन
सके राखौंला पुर्खाको नाम नसके बदनामी गरिदैन
चाकरी चाहिएको हो भने माफ गर्नु होला महाशय
भोकभोकै मरिएला तर कसैको पनि गुलामी गरिदैन ।

३. काम हेरौंला हातमा जब हँसिया र कोदालो आउँछ
दौडको गति हिसाब होला जब बाटो उकालो आउँछ
सहन्छ भन्दैमा नहेप्नुस् हजुर सहनुको पनि हद हुन्छ
हेर्दै जानुस् के हुँदो रैछ जब हाम्रोे पनि पालो आउँछ ।

४. उजाडेर बाग जिन्दगीको किन यसरी खरानी घस्छस्
बर्बाद गर्छस् जिन्दगी किन आफैले आफैलाई डस्छस्
मनको चैन र आँखाको निद जसले लुटेर लगेका हुन्
उनैले आई सोध्ने गर्छन किन रातभर जाग्राम बस्छस् ।

५. ढुङ्गालाई आगोमा ततायो भने नतिजा के हुन्छ बिचार गर्नू
आँगनमै हाप्सिलो करायो भने नतिजा के हुन्छ बिचार गर्नू
प्रतिवादमा उत्रिएन भन्दैमा नहेप्नु अन्तिम पटक म भन्दैछु
निदाएकोे शेरलाई जगायो भने नतिजा के हुन्छ बिचार गर्नू ।

०००
भैरहवा