नेपाली हास्यव्यङ्ग्य अनलाइन पत्रिका

ठाकुरप्रसाद अधिकारी :

ए टुकुचा तिमी दौडिँदा अलकापुरी बोल्छ
तिमी घिस्रिँदा झुकेको काठमाडौ बोल्छ
तिमी बागमतीमा हाम्फालेर मिसिँदा
बागमतीले कहिल्यै अस्वीकार गरिनन्
हो, सानै भए पनि तिमी नदी हौ
‘चा’ लगाएर बोलाउँँछन् सबैले
अनेक चियोचर्चा हुन्छ तिम्रो
यहाँ मलामी र सलामी चाख्ने
सिंहदरवारका लाउकेहरू छन्‌
तिम्रो उदाहरण दिने टाउकेहरू धेरै छन्
टुकुचा तिमी फोहरको उपमा भएकी छौ
तर अहिले तिमीभन्दा दशौँ गुना फोहर भएका छौँ हामी
यही फोहरको रासमाथि
नवनेपालको सास चलिरहेको छ
समृद्धि, समुन्नति र नवसभ्यताको
तुमुल नाराले होसहवास उडाइरहेको छ
टुकुचा तिम्रो गन्ध के गन्ध हो र
तिमी भन्दा दशौँ गुना बढी
न्यायको मूर्ति गनाइरहेको छ
तिमीभन्दा दशौँ गुना बढ्ता
हाम्रो भाग्यविधाता नेता गनाइरहेको छ
दुख नमान टुकुचा
तिमी भन्दा दशौँ गुना बढ्ता
हाम्रो लोककल्याणकारी राज्य गनाइरहेको छ
तिमीले ढल र मलमुत्र बोके जसरी
हामी भ्रष्टाचार, बेइमानी र मानव तस्करी
बोकेर हिँडिरहेका छौँ
तिमी त अब गङ्गाजल भयौ
हामी पो अब ढल र मल भएका छौँ
साँचै हो टुकुचा
हामी आफैं नेपालका दल भएका छौैँ
हामी आफैं दुर्गन्धित ढल र मल भएका छौँ ।

०००
तुप्चे– ४, नुवाकोट । काठमाडौ– १५, चमती
हाल : सिड्नी, अष्ट्रेलिया