नेपाली हास्यव्यङ्ग्य अनलाइन पत्रिका

बिन्दु दहाल मूकदर्शक :

मागी भोट जिती पुगी सदनमा उङ्दै बसेको छु म
भत्ता थाप्छु सधैँ र मस्त जनता ठुङ्दै बसेको छु म
ताली ठोक्छु म टन्न बोक्छु रुपियाँ सिन्को नभाँचे पनि
सक्दो हाँस्छु खितित्त देश जनता हाँस्दै नहाँसे पनि ।

जोडेँ कार किनेँ विकास नगरी कल्ले मलाई छुने
चिप्ला भाषणमा भुलेर सबले नेता मलाई चुने
हल्ला बेच्छु बजार देख्छु यसकै नेपालमा सुन्दर
हाल्छन् भोट म जित्छु फेरि यसरी भेडा बनाई नर ।

आएको रुपियाँ बजेट म खुसी हाल्ने छु गोजी भरी
मान्छे हुन्न ठुलो म बुझ्छु जहिले सेवा कसैको गरी
भट्टी जाँड जुवा वयस्क तरुनी साथी बनाएपछि
बग्ने गर्छ कुलो उँभो गजबले गैरो खनाएपछि ।

झारा टार्न विकास गर्छु म सधैँ को बोल्छ मेरा अघि
कोही बोल्छ भने म दन्त उसको झार्ने छु गुन्डा लगी
भर्ती केन्द्र म खोल्छु लठ्ठक सबै साला र सालीधरि
लाई जागिर दिन्छु बेच्छु जनता भेडा र बाख्रासरि ।

ऐलानी ढलनाल या बगर ती सारा हसुर्दै छु म
मेरा कर्तुतका सबै रहहरू खोजेर पुर्दै छु म
सत्ता शक्ति सशस्त्र काम गहना आदर्श पार्दै छु म
नाङ्गै नाच्छु हँसाउने छु दुनियाँ नेपाल दार्दै छु म ।

०००
दमक= ८, झापा