नेपाली हास्यव्यङ्ग्य अनलाइन पत्रिका

पुण्यप्रसाद खरेल :

“अब हामी उठ्छौं” भन्नेहरूलाई
मेरो केही भन्नु छैन
तैपनि भन्छु:–
“उठ ! जुरुक्क जुरुक्क उठ !
शमशेरहरूलाई पनि
बोलाऊ र भन, उठ !
शाहहरूलाई पनि
बोलाऊ र भन, उठ !
तिमीहरू पनि उठ !
म पनि तिमीहरूलाई भन्दैछु, उठ !
नेपालीलाई त्यसरी नै
भुटानी बनाएर बेच्नेहरू उठ !
गिरीबन्धु सुम्पनेहरू उठ !
वाइडवडीमा अरब-खरब लुँड्याउनेहरू उठ !
नेपाल ट्रस्टका सम्पत्तिबाट
फाइदा लतार्नेहरू उठ !
सरकारी नियुक्तिमा आफ्नालाई राख्नेहरू उठ !
पहुँच पुर्याएर राष्ट्रको तरमा
पौडिरहेकाहरू उठ्नैपर्छ उठ !
निजीशिक्षा र निजी अस्पतालबाट
सारा नेपालीको रगतले नियमसङ्गत रूपमा
मोटाइरहेका उठ !
उठ्न नसक्ने त तिनै विचरा आम श्रमजीवीहरू हुन् ।
तिनलाई हारालुछ लुछ्नेहरू
उठ्नुनै त यथार्थ ह‍ो उठ !
धेरै आन्दोलन असफल भएका छन् ।
थप यो एउटा थपक्कै
असफल भयो भन्नु त ह‍ो इतिहासले !
उठ जनताका वैरीहरू उठ !
फेरि “कुशासन कायम राख्छौं” भन्दै उठ !
फेरि “भ्रष्टाचार गर्छौं” भन्दै उठ !
फेरि “नेपो-बेबी मच्चाउँछौं” भन्दै उठ !
“अर्काको बानी को लिन्छ
आफ्नो बानी को छोड्छ ?” भन्दै
नारा लगाउँदै उठ !

०००
झापा