नेपाली हास्यव्यङ्ग्य अनलाइन पत्रिका

पुण्यप्रसाद खरेल :

महिषासुर गर्भिणी भएको छ
के ब्याउँछ ?
जिज्ञासा फलेका छन् सबैका मनका बेँसीमा
गर्भको बात हो के पाउँछ पाउँछ !
तर पनि उल्कापात हो राँगो ब्याउँछ ।

हुने बेलामा गोरु ब्याउँछ रे !
तर राँगो कतिवेला ब्याउँछ ?
ब्याउँछ कि ब्याउँदैन के ठेकान !
तैपनि साँझ-बिहान भएको छ रे
असिना पसिना भएको छ रे
प्रत्येक हेर्नेहरू यस्तै भन्छन्
भेट्नेहरू त्यस्तै ल्याउँछन् खबर
महिषासुर उठ्तै-बस्तै गर्दैछ रे
पौँठा वसिसकेका छन् रे !

पाडो पाउँछ कि पाडी पाउँछ ?
महिषासुर पाउँछ कि कामधेनु ?
ब्याउने राँगो हो के पाउँछ !
नेपालमा महिषासुर ब्याउने रे
हो महिषासुर राँगोले के पाउँछ ?
बाबुको छोरो पाउँछ कि
आमाको छोरो पाउँछ !

के जन्माउने हो के पाउने हो ?
नाम राखिसकेका पुरेतहरू !
ग्रह गुनेर हेर सुत्केरो कसरी हुन्छ ?
राँगोको गर्भकाल कति हो ?
कहिल्यै नब्याएको राँगोको गर्भकाल
हे फजिति…
तीन महीना, छ महीना, वर्ष…
गर्भकालको के ठेगान
तैपनि भन्छन् हेर्नेहरू, भेट्नेहरू
ब्याउँछ ! ब्याउँछ !!
महिषासुर पक्का ब्याउँछ ।

०००
झापा
रोकिन्न कावेली (२०६७)