नेपाली हास्यव्यङ्ग्य अनलाइन पत्रिका

अनिता काेइराला :

छक्क परेकी छु
दुप्चेश्वको यो अक्करमा
ढुङ्गा रसाएको आडैमा देख्दै छु
ढुङ्गामाथि नै सतबीज उम्रिएको भेट्दैछु
उमारेर छातीमा आशाको
जीवन्त हाँसो ढुङ्गाकै सुन्दैछु
सर्वशक्तिशाली शिव पनि
सानन्दमा मौन नै भेट्दैछु
शान्तिको शीतल पवनमा मक्ख परेकी म
हृदयमा बजारिएको
पेचिलो आवाजले लज्जित हुँदैछु
सुक्खा पातले उपहास गरेको सुन्दैछु
धर्मान्धको आँधीमा उडेको
ए मूर्ख मान्छे !
अहंकारको अक्करमा
अमानुष बनेको तेरो संसार
किन यस्तो छ ?
धर्मको कालो झण्डा फहराउँदै
सिङ्गो मानताको मलामीमा
नाङ्गो नाच किन गर्दैछ ?

हेर अन्धभक्तको विमूढता
ढुङ्गा ईश्वर बन्न सक्ने सम्भावनालाई लत्याएर
विवेकको हत्या गरेको मान्छे
जलाउँदै छ अर्को जीउँदो मान्छे ।

०००
२०८२-९-७
गुर्जुधारा