नेपाली हास्यव्यङ्ग्य अनलाइन पत्रिका

मीनप्रसाद लामिछाने :

सर्टलाई पाइन्ट भित्र हालिरहनु परेन अब
बरु बाहिरै छोड्दा सहज हुने भयो
सुट चाहिएन पार्टीहरुमा जान पनि
भेटिए जुत्ता नत्र चप्पलमै गयो
भने पछि बुढो भएकै हो म ।

म आफ्नाहरुका लागि धेरै ठाउँमा केटी हेर्न गएको छु
मुटु ढुकढुक हुँदैन उनीहरुसँग कुरा गर्दा पहिला जस्तो
अहिले म उनीहरुको छाला हैन चाला हेर्ने भएको छु
भने पछि बुढो भएकै हो म ।

नाक कान भित्रका रौं उखेल्ने कुरा त परै जाओस्
अब त मलाइ दिनहुँ दाह्री पनि काटिरहनु परेन
यौवनाहरु नजिक पर्न असजिलो मान्न छाडे
श्रीमतीले शंका गर्न छाडिन् अब ढाँटिरहनु नि परेन
भने पछि बुढो भएकै हो म ।

आत्मरतिमा रमाउने दिन गए
आलोचना र निन्दा समेत पच्न थाल्यो
साथी संगाती पनि घट्दै गए अब
एकान्तमा दिल बस्न थाल्यो
भने पछि बुढो भएकै हो म ।

मान अपमानले खासै फरक पार्दैन आजकल
बोलाए गैदिन्छु, दिए खाइदिन्छु
पहिरन राम्रो नराम्रो भन्ने पनि रहेन अब
जे जस्तो भेट्यो लाइदिन्छु
भने पछि बुढो भएकै हो म ।

कुनैबेला ‘अभिसारिका’ मन पर्ने मलाई
आजभोलि गीता खुब मन पर्न थालेको छ
रोदी र डान्सबार नापेर नथाकेका यी पैतालाले
अब मन्दिरको परिक्रमा गर्न थालेको छ
भने पछि बुढो भएकै हाे म ।

०००
हेटाैँडा