नेपाली हास्यव्यङ्ग्य अनलाइन पत्रिका

१.
मलाई त खुट्टा ढोग्न पनि आउँदैन मलाई त खुट्टा मोल्न पनि आउँदैन
मलाई त कसैको कुरा लाउन पनि आउँदैन मलाई त कसैको जयजयकार गर्न पनि आउँदैन
त्यही भएर होला मेरो पालो कहिले पनि आएन हजुर ! मान्छेहरू कहाँकहाँ पुगिसके
मलाई त कोसेलीपात टक्र्याउन पनि आउँदैन मलाई त, ‘ठालु’को अगाडि लम्पसार पर्न पनि आउँदैन ।

२.
समाज बदल्न हिँडेकाहरू आज आफैं बदलिएछन्
पुरानो भत्काउन लडेकाहरू आज आफैं पुरानो भएछन्
आफू न नयाँ हुन सकियो न पुरानो हुन सकियो बिचमै अड्किएर बस्नु पर्यो
गीत क्रान्तिको गाउनेहरू आज आफैं भ्रान्तिमा हराएछन् ।

३.
मैले मात्रै सम्झेर के गर्नु तिमीले बिर्सेपछि
मैले मात्रै अँगालेर के गर्नु तिमीले पन्छाएपछि
तिम्रो लागि त अरू नै प्यारा छन् म त को हुँ र ! हिजो पो काम लाग्थेँ
मैले मात्रै हँसाएर के गर्नु तिमीले रूवाएपछि ।

हेटौडा, मकवानपुर