नेपाली हास्यव्यङ्ग्य अनलाइन पत्रिका

‘हाम्रा’ हुन्छन् सफल किन हो योग्य खेदिन्छ, डर्छ
बत्ती आफ्नो वरपर भए मात्र आलोक छर्छ ।
नातागोता, भनसुन कृपावादले काम दिन्छ
देखे पैसा जटिल, नहुने काम चाँडो सकिन्छ ।।

सालासाली जति पनि थिए जागिरे भै सकेछन् ।
मन्त्री ऐले अरबपति भै गाउँ छाडी गएछन् ।
पैसा पाई सकल दलका कार्यकर्ता खुसी छन्
’राम्रा’ मान्छे पहुँच नपुगी खिन्न, झन् बेखुसी छन् ।।

आफ्नो राम्रो सब तर अरूले गरे हुन्न राम्रो
बोली फेर्छन् पलपल उही हुन्छ राम्रो, नराम्रो ।
हुन्छन् साना विषय, झगडा गर्न अभ्यस्त नेता
लड्छन् आफू हरदिन सबै बन्न खोज्छन् विजेता ।।

भ्रष्टाचारी सबतिर पुगे बन्छ आदर्श पासो
यस्तै चाला दिनदिन हुँदा कानुनी राज हाँसो ।
गै गो हाम्रो विगत गरिमा राज्य लाचार बन्दा
सत्ता, पैसा, तिकडम ठुलो आज यो देश भन्दा ।।

गल्ती गर्दा दलबल भई गर्दछन् ढाकछोप
पैसा खाई नियम नमिले के भयो लाग्छ तोक ।
राम्रो गर्दा सहन नसकी दिन्छ मान्छे सराप
आफ्ना मान्छे सबल नहुँदा योग्यता भो धराप ।।
बैतडी, हाल– सुर्खेत