नेपाली हास्यव्यङ्ग्य अनलाइन पत्रिका

मम्मी आज त लेट् भयो बोर्डिङ् नजाऊँ कि ता
काहाँ छन् कपि बुक् इरेजर अझै गैगो कता हो कता ?
पेन्सिल् झन् सकियो दुई दिन भयो किन्दै नकिन्ने किन ?
डर्टी ब्याग भयो भनेर यसरी बुझ्दै नबुझ्ने किन ?

टाई खै, अनि शूज पालिस कठै मैले लगाऊँ भने
ड्रेस् मा प्रेस अझै लगाउन त्यसै पक्का छ बस् मिस् हुने
ड्याडीको पनि काम के छ र सधै आफिस् गई फर्कने
टीफिन् पनि एक थोक छ सधै प्रेस्टीज ईसू हुने ।

एङ्ग्री छन् सर मिस् र म्याडमहरू बुझ्दै नबुझ्ने तिनी
डेली बन्नु छ हेन् पिटाइ सहनू खेल्दै नखेल्नू भनी “
छोराका गनगन् सुनेर पनि खुब् हामी खुसी मान्दछौं
इङ्लिस् मा उसको प्रभाव कसरी बढ्दो छ यो गुन्दछौं ।

हेल्लो माम् अनि ड्याड् भनेर जब ऊ हामी नजीकै पुगी
पोइम् का हरफै सुनाउँछ अहा अङ्ग्रेज जस्तै गरि
हाम्रो चेस्ट फराक भै भुटुक झैं नाकै फुलाईकन
प्रोग्रेस् भो कति हेर बोर्डिङ गई भन्छौं रमाईकन ।

मम्मी ड्याडी भनिकन जसै सन् डटर्ले पुकार्छन्
यो सुन्दैमा पुलकित भई कान यी दङ्ग पर्छन्
ओ स्वीट् मम्मी टिफिन गरछौं आज क्यान्टीनमाहाँ
अङ्ग्र्रेजीको यति विधि सधै हुन्छ पूजा मकाहाँ ।

अङ्कल् आन्टी कजिन सबको चित्त नै चोरिदिन्छन्
बाय् बाय् भन्दै सबतिर खुसी पारदै छोडिदिन्छन्
उठ्दाउठ्दै उनकन सधै एग औ ब्रेड मिल्छन्
निस्तै खान्नन् प्रतिदिन यिनी मिल्कका साथ निल्छन् ।

बुटवल