नेपाली हास्यव्यङ्ग्य अनलाइन पत्रिका

प्रिय माक्र्स
तिम्रा तस्वीरहरूलाई अहिले
गधा र बाँदरहरूले घेरिरहेछन् {{read_more}}
मैले तिम्रो तस्वीरमा
माल्यार्पण गर्न सकिन

गधा र बाँदरहरूको घेराबाट बाहिर
अलि टाढा उभिएर
प्रिय माक्र्स
म तिम्रो
संकटग्रस्त तस्विर टोलाइरहेछु

कुनै पनि बेला
ती बाँदरहरू
गधाहरूको ढाड चढ्ने छन्
र च्यात्ने छन् तिमीलाई

म त एउटा निहत्था
गरिब मान्छे हुँ
प्रिय माक्र्स
जो तिमीले युगौं अगाडि
देखाएको डकुमेन्ट्री हेरेर
सुख पाउने प्रतीक्षामा छ

त्यसकारण प्रिय माक्र्स
मलाई अहिले
बाँदर र गधाहरूको घेराभित्र रहेको
तिम्रो तस्वीरको चिन्ता छ

आफूलाई बचाउ
प्रिय माक्र्स

तिमी बाँच्यौ भने
मेरो आशा पनि बाँचिरहन्छ
तिम्रो तस्विर पनि बाँचिरहन्छ

प्रिय माक्र्स
तिमी पर्वत हौ
र म सिसिफस

(समय, असोज १७, २०६४)