नेपाली हास्यव्यङ्ग्य अनलाइन पत्रिका

रतिकला मेडम (कामरेड खादुरामकी ल्याईता) तीन बालक सहित थानकोट-नगरकोट बसमा चढिन् । बस कोटेश्वरको जाममा रोकिइराखेको थियो, कन्डक्टर भाडा उठाउँदै रतिकलाको छेउँमा आयो । उनले ५० को नोट निकालेर दिइन् ।

कन्डक्टरले भन्यो- ४ जनाको २०० रूप्या दिनुस् न ! के ५० दिनुभएको दिदी ?
“बच्चाको पनि भाडा लाग्छ र भाइ ? अरू बसले त लिँदैनन् ! यो कस्तो बस हो तिम्रो ?” रतिकला झन्किन् ।

“१० वर्ष माथिकालाई त भाडा लागिहाल्छ नि दिदी ! भाडा नतिरी यात्रा गर्न त आफ्नै निजी कारमा चढ्नुपर्‍यो नि, पब्लिक बसमा त लागिहाल्छ नि ! फेरि बच्चा भन्नुहुन्छ, दाह्रीजुँगा झपक्कै छन् त ! कति कति वर्षका हुन् यी भन्नुस् त !” अरू यात्रुका मुखाँ हेर्दै कन्डक्टरले व्यङ्ग्य गर्‍यो ।

रतिकला- पहिलो आठको, बीचको साढे आठको अनि तेस्रो चाहिँ नौको ! सबै १० वर्षमुनिका त छन् नि.. !

कन्डक्टर- बरू भाडा नतिरे नतिर्नुस् हेर्नुस् दिदी ! तर कम से कम ९ महिनाको ग्याप त राख्नुस् ! छ/छ महिनामा पनि कसैले छोराछोरी पाउँछन् ?

रतिकला- भो भाषण नछाँट् धेरै ! तैंले सिकाउनुपर्छ कति कति ग्यापमा पाउने भनेर ? बडो प्रवचन दिँदोरैछ…! ऊ त्यो बीचको चाहिँ सौताको छोरो हो । अब त बुझिस् होला नि ! जा उता !!….
कन्डक्टर- हैट् … ।

काठमाडाैं