नेपाली हास्यव्यङ्ग्य अनलाइन पत्रिका

जाने चुनाव गैगयो, आउने चुनाव धनपाले जित्ने नै भयो । धनपाको घोषणपत्र बोक्नुस् ! छाप यसैमा ठोक्नुस् !!

१) प्रत्येक नागरिकले निःशुल्क स्वास्थ्य सेवा प्राप्त गर्ने व्यवस्था मिलाइने छ । प्रत्येक विरामीले आफूले रोजेको डाक्टरबाट रोजेको अस्पतालमा उपचार गर्न पाउनेछन् ।

२) प्रत्येक नागरिकका सन्तानले निःशुल्क रुपमा विश्वस्तरीय शिक्षा प्राप्त गर्ने व्यवस्था मिलाइने छ । प्रत्येक विद्यार्थीले रोजेको शिक्षकबाट रोजेको शिक्षण संस्थामा रोजेको विषय अध्ययन गर्न पाउनेछन् ।

३) कुनै पनि नागरिकले बेरोजगार भएर बस्नुपर्ने छैन । काम गर्न इच्छा भएका प्रत्येक नागरिकले आफूले रोजेको स्थानमा चाहेको तलबसहित रोजगारी पाउनेछन् ।

४) ड्राइभिङ् नजान्ने, अन्धा-अपांग र ज्येष्ठ नागरिकलाई दक्ष चालकसहित लक्जरी कार उपलब्ध गराइने छ । प्रत्येक केटीहरूलाई कम्तीमा एउटा भेस्पा र केटाहरूलाई पल्सर उपलब्ध गराइने छ । सोका लागि आवश्यक इन्धन र सर्भिसिङको व्यवस्था मिलाइने छ ।

५) प्रेमालाप गर्नेहरूका लागि प्रत्येक वडामा कम्तीमा १०० बेडको एउटा होटल एण्ड लज र रोमान्टिक पार्क बनाइने छ । उनीहरूले गल्लीमा लठारिएर हिड्नुपर्ने अवस्थाको अन्त्य गरिनेछ ।

६) ट्यापे र ट्वाँकेहरूका लागि आवश्यक मात्रामा मालबुटी निःशुल्क उपलब्ध गराउन स्पेशल “मिदी“ खटाइने छ ।

७) प्रत्येक नागरिकलाई …फिल्म हेर्न, प्रत्येक केटाकेटीलाई गेम खेल्न र गृहिणीलाई टिकटक बनाउन हत्केलामा नअँट्ने एउटा स्मार्टफोन निःशुल्क उपलब्ध गराइने छ ।

८) प्रत्येक किसानलाई खेत जोत्नुअघि एक ट्रयाक्टर मल निजको घरमै उपलब्ध गराइनेछ ।

९) प्रत्येक नागरिकलाई बिजुली र पानी पुगिसकेको हुँदा छिमेकी मुलुकका घरघरमा निःशुल्क आपूर्ति गरिनेछ ।

१०) स्वेदेशी नागरिक दिनहुँ भटाभट विदेश गएकोबाट मुलुकमा नागरिकको अभाव भइरहेको दृष्टिगत गरी नेपाली नागरिकसँग विवाह गर्ने विदेशी महिला वा पुरुषलाई जग्गेमै नागरिकता वितरण गरिनेछ । कुनै नेपाली नागरिकसँग लभ परेको स्वघोषणा गर्ने विदेशी नागरिकले समेत सो सुविधा प्राप्त गर्नेछन् ।

हाम्रो गौरवशाली पार्टीलाई
मात्र एउटा भोट दिनुहोस्,
दसोटा सुविधा लिनुहोस् !

नत्र,-
सम्झिने, पानी छम्किने !

धर्तीमा नभएको पार्टी (धनपा)
चुनाव प्रचारप्रसार समिति
केन्द्रीय कार्यालय,
माठकाडौं, लेपान ।

०००