नेपाली हास्यव्यङ्ग्य अनलाइन पत्रिका

गाेपेन्द्रप्रसाद रिजाल  :

प्याराेडी

(देउराली उकाली चढेरको भाकामा )

जनताको बुइ चढेर
ढाँटेर चुनाव लडेर
बाघ बनेर पसेथ्यौ
(बिरालो बन्दै खसेछौ)२

पर्नु पिर पर्यो तिम्लाइ
कुर्सीमा झिर पर्यो
(तिम्लाइ कुर्सीमा झिर पर्यो)२

लाशमा बास बसेर
जङ्गलमा हामी डुलेथ्यौँ
भुटुङ्टुङ् गोली पड्काइ
(जाती र धर्म हुलेथ्यौँ)२
अब त तिम्रो पाँचतले घर
पार्किङ्ग्मा देख्छु पजेरो कार
लुट्नु लुटेछौ कम्रेड
ढुकुटी भुटेछौ ।

जोतिषिलाइ खारेर
चिट्ठामा कुर्सी पारेर
मुखमा भोला हाले जस्तो छ
जहानलाइ कमिशन सस्तो छ
तिम्रो त बुद्धि मोटो छ
सोच्ने शक्ति छोटो छ
(गर्नु गर्या छौ ढेउबा
चेपुवामा पर्या छौ)२

ओठमा उखानको भकारी छ
खाने र बस्ने सर्कारी छ
रेलको सपना बाँडेर
जनताको बुद्धि फाँडेर
(जुदाउनु जुदायौ बाबै
जुदाउनु जुदायौ)२

अब त आउँदो भोटमा
तिम्रो बास हुन्छ गोठमा
(आजै बिदा लेउ
नत्र लाग्ने छौ तिमी छेउ)२

जनताको बुइ चढेर
ढाँटेर चुनाव लडेर । २

०००
मैतीदेवी, काठमाडाैं