अमर अधिकारीनाफामूलक धर्म
देखावटी भेषधारी बग्रेल्ती छन् योगी पाँचतारे होटलका मालिक अनि भोगी । काम यहाँ नपाएर धेरैलाई छ सास्ती आश्रम खोली ठग्नेलाई धेरै धेरै मस्ती ।
अमर अधिकारी :
कलियुगमा चलिआयो नाफामूलक धर्म
अन्धभक्त बढ्नथाले गर्न छाडे कर्म ।
फलानानन्द फलानेश्वर ढोँगी बाबा धेरै
लठ्ठिरहने अन्धभक्तको पैसा गयो खेरै ।
कतै हुन्छ कोटीहोम कतै पुराण कथा
जति दान गरेपनि मेटिँदैनन् व्यथा ।
सीमापारीबाट बाबा-गुरु-सन्त आउँछन्
अन्धभक्त भुलाउनलाई मीठा भजन गाउँछन् ।
सुन चढाए नगद चढाए पाखण्डीका हातमा
धर्म भयो भन्दाभन्दा केही भएन साथमा ।
आश्रम खोल्नु ठूलो उद्योग नगद खनखनी
पाखण्डीका सामु नाच्छन् चेली छमछमी ।
धनको वर्षा हुन्छ भन्दै बेच्ने गर्छन् जन्तर
फलिफाप बढ्छ भन्दै भिडाउँदैछन् मन्तर ।
माला बेच्छन् औँठी बेच्छन् मालामाल धनको
सोझालाई ठग्न पाउँछन् कुरा बुझ्छन् मनको ।
नेपालीलाई बेबकुफ बनाई ओसार्दैछन् नगद
पाखण्डीको दर्शन पाउँदा अन्धभक्त गदगद ।
देखावटी भेषधारी बग्रेल्ती छन् योगी
पाँचतारे होटलका मालिक अनि भोगी ।
काम यहाँ नपाएर धेरैलाई छ सास्ती
आश्रम खोली ठग्नेलाई धेरै धेरै मस्ती ।
खुबै चल्छ कलियुगमा नाफामूलक धर्म
अन्धभक्त आश्रम जान्छन् ताला ठोकी घरमा ।
०००
बुढानीलकण्ठ, काठमाडौं ।
Subscribe
Login
0 Comments
Oldest
