नेपाली हास्यव्यङ्ग्य अनलाइन पत्रिका

काशीनाथ मिश्रित :

जनतालाई गणतन्त्र बेकामको भाँडो भयो ।
त्यसैले त नेतालाई गणतन्त्र घाँडो भयो ।।

साँच्चै भनौँ भने देश निकै नै छ मर्माहत ।
देशलाई नै गणतन्त्र पैतालाको काँडो भयो ।।

मैले सोँच्थेँ सगरमाथा नेपालको गौरव हो ।
तर आजभोलि भने फोहोर फाल्ने डाँडो भयो ।।

घुस दिन घुस लिन हुन्न भन्थे अघिकाले ।
ऐले भने लपलप खान मिल्ने फाँडो भयो ।।

नारी बेचबिखनको होडबाजी चलेको छ ।
स्वास्नी छँदै नेपालको गणतन्त्र राँडो भयो ।।

पोखरीका भ्यागुता जस्ता हाम्रा नेताहरूलाई ।
अझै पनि गणतन्त्र दुई शताब्दी चाँडो भयो ।।

सुरक्षित राखेँ मैले राम्रो काम देला भनी ।
ऐले आफ्नो कलम पनि बेकामको ठाँडो भयो ।।

०००
गुल्मी