नेपाली हास्यव्यङ्ग्य अनलाइन पत्रिका

कृष्णप्रसाद गौतम :

यता पार्टी उता पार्टी हेरियो लोकतन्त्रमा
कताको यो कताको ऊ खेरियो लोकतन्त्रमा ।

मुखमा तेल राखेका वाचाल जनका पछि
जता तेल उतै खेल घेरियो लोकतन्त्रमा ।

यता आऊ उता जाऊ लेख टाँस जतात्यतै
भन्दथे स्वर्ग झार्दै छु टेरियो लोकतन्त्रमा ।

साम्राज्यवाद सामन्त विरोधी अभियानमा
निर्धाकै लाशमा कात्रो बेरियो लोकतन्त्रमा ।

सोझाका काँधमा टेकी सत्तासीन भएपछि
चालढाल सबै टेढो फेरियो लोकतन्त्रमा ।

सपना समता शान्ति समृद्धि र विकासका
स्वाभिमानी कथा हाम्रा केरियो लोकतन्त्रमा ।

नबस्दा ज्ञानका भोका ऊर्जाशीलहरू यहाँ
चाहना त्यो समृद्धिको सेरियो लोकतन्त्रमा ।

०००
इटहरी-५, सुनसरी ।