नेपाली हास्यव्यङ्ग्य अनलाइन पत्रिका

पदम भण्डारी :

खेतबारी गाईभैंसी, गोठ लिनुहोस्
मेरो दौरा सुरवाल, कोट लिनुहोस् ।१।

देशमा केहि गर्छु भनि, दुःख कष्ट झेलें
म भन्दिन मेरा दुःख, चोट लिनुहोस् ।२।

तपाईंकै मान्छेले हो, मलाई रुवाएको
झरेका आँसु काँपेका, ओंठ लिनुहोस् ।३।

मेरो छाक टार्ने कुरा, मेरा लागि ठूलो
दिनुहोस् पैसा मेरो, भोट लिनुहोस् ।४।

जल जमिन जंगल, पारि सुम्पेपछि
कमि हुन्न त्यसपछि, नोट लिनुहोस् ।५।

नोटको कमि नभएसी, सबै कुरा पुग्छ
त्यसपछि जाँड रक्सी, चुरोट लिनुहोस् ।६।

नोटै खानु नोटै लाउनु, नोटै ओढ्नुस् र
देशलाई ध्वस्त पार्ने, अठोट लिनुहोस् ।७।

०००
चितवन