नेपाली हास्यव्यङ्ग्य अनलाइन पत्रिका

१.
जहिल्यै उनान्सय जस्तो सय न हजार जस्तो
कहिले अस्पताल जस्तो कहिले मजार जस्तो
बडो अभरको हुँदोरहेछ यो सम्बन्ध भन्नु पनि
छिनछिनमै उतारचढाव हुने पूँजीबजार जस्तो ।

२.
मागेको मुठ्ठीले घरको भकारी भर्दैन थाहा छ
काँपेका खुट्टाले जङ्घार कैल्यै तर्दैन थाहा छ
के दिउँ म शुभकामना विदेशी भरियाहरूलाई
खेतालाले किसानको भलो गर्दै गर्दैन थाहा छ ।

३.
सत्ताको सुमेरु परिक्रमा गर्ने ढङ्ग छैन भने
तपाइँको सेवाले विधाता यदि दङ्ग छैन भने
नसोच्नु पाइनेछ देशमा निष्पक्ष नियाँ निसाफ
कानुन किन्नसक्ने ल्याकत आफूसङ्ग छैन भने ।

४.
अभाव असुरक्षा चिन्ता र विषाद छ घर घरमा
डस्दैछ महङ्गीले गोमन सर्पलेझैँ प्रत्येक प्रहरमा
सुर्ता तँलाई सधै सुविधा र मर्यादाक्रम वृद्धिको
भनी दे सरकार जनताको क्रम छ कुन नम्बरमा ।

५.
टुटी फेरिएको हो जार उस्तै उस्तै हो
खुर्पा फेरिएको हो धार उस्तैउस्तै हो
न व्यवस्था फेरिन्छ न अवस्था हाम्रो
रूप फेरिएको हो सार उस्तै उस्तै हो ।

०००
गुल्मी