नेपाली हास्यव्यङ्ग्य अनलाइन पत्रिका

हरिप्रसाद पौड्याल :

१.
धोका दिइस् जनतालाई बुझेँ जब ऐले
पुनर्विचार गर्नु पर्ने भयो तब मैले
राष्ट्र खोक्रो बनाएर भरिस् आफ्नै भुँडी
साथ दिन सकिँदैन तँलाईं अब कैले ॥

२.
कुरा एउटा काम अर्को गर्छ सोझै ढाँट्छ
हाँडीघोप्टे घ्याम्पे भुँडी भर्छ बोझै आँट्छ
बिरालाको ढाडे जस्तो दुष्ट उसको बानी
तर चोरी खाइदिन्छ हात रोजै चाट्छ ॥

३.
हुन्छन् किर्ते काम यहाँ गर्छन् छलछाम
गाई मारी गधा पोस्छन् कमाउँछन् दाम
दया धर्म मानवता भेटिँदैन कतै
निमुखाले अनाहकमा गुमाउँछन् नाम ॥

०००
धुलाबारी, झापा ।