नेपाली हास्यव्यङ्ग्य अनलाइन पत्रिका

रुद्र ज्ञवाली :

१.
साँझ बिहान दिनमा अथवा रातमा पनि
काम लागूँ ज्युँदो ज्यान या लाशमा पनि
बनेर बरू एक टुक्रा काठ म श्रीखण्डको
फैलाऊँ सुवास घरमा पनि र घाटमा पनि ।

२.
हिमाल जत्तिकै पो अग्लिनु भएछ धन्यवाद
फराकिलो छलाङ् फड्किनु भएछ धन्यवाद
कसरी चढाउँ कृतज्ञता र आभार जाहेर गरूँ
कुरा काट्नै भएपनि सम्झिनु भएछ धन्यवाद ।

३.
यत्ति कामना छ इमानमा कतै दुलो नपरोस्
आँखाहरूमा खुर्सानी पिसेको धुलो नपरोस्
उपचार सम्भव छ आँखाभित्र पर्‍यो भने बरू
चिन्तन र चेतनामा कसैको पनि फुलो नपरोस् ।

४.
मर्यादित र छाडाको आ-आफ्नै जिन्दगी हुन्छ
माछो र चेपागाँडाको आ-आफ्नै जिन्दगी हुन्छ
किटान गर्न नमिल्दो रहेछ परिभाषा जीवनको
फूल अथवा काँडाको आ-आफ्नै जिन्दगी हुन्छ

०००
भैरहवा