नेपाली हास्यव्यङ्ग्य अनलाइन पत्रिका

दीनानाथ पोख्रेल :

समस्याः- बाबाआमा रमाऊन् हरदिन घरमा मिल्छ उल्लास भारी ॥

दुर्गादेवी उदाऊन् भवभर जति छन् वृद्धवृद्धा रमाऊन् ।
साक्षात् हुन् देव ठानी जन नयन खुलून् सौम्य आभा जमाऊन् ॥
सेवा हो योग्य मानून् मनुज कृत चुनून् कृत्य ऊर्जा उमारी ।
बाबाआमा रमाऊन् हरदिन घरमा मिल्छ उल्लास भारी ॥२१॥

उम्दा छन् कर्म केके मनुजमन खटी छान्न जानौँ क्रमैले ।
अग्ला छन् वृद्धवृद्धा अनुभव बटुली मान्न जानौँ सबैले ॥
हट्दै जानेछ जालो मन घन कुहिरो ज्ञान आँखा उघारी ।
बाबाआमा रमाऊन् हरदिन घरमा मिल्छ उल्लास भारी ॥२२॥

लौरा हुन् पुत्रपुत्री मनबल थपिई वृद्ध सन्तोष मानून् ।
पालो हो चक्रजस्तै समय गतिसँगै झेल्नु पर्नेछ जानून् ॥
पृथ्वीको ऐन हो यो सहज हृदयले टिप्न जानोस् सकारी ।
बाबाआमा रमाऊन् हरदिन घरमा मिल्छ उल्लास भारी ॥२३॥

मौरीको योग हेरी हितफल श्रमले टिप्नु पर्नेछ ठानी ।
सेवा हो दिव्य बाटो मनुज खुस हुने कर्म पक्रूँ म जानी ॥
बाबाआमा उठाऔँ मनसुख बटुलोस् नित्य आँखा उघारी ।
बाबाआमा रमाऊन् हरदिन घरमा मिल्छ उल्लास भारी ॥२४॥

लौ वृद्धावृद्ध बन्दा मनकस नरहोस् सौख्य बस्नेछ साथ ।
अग्लेला चेत आफैँ समय गुण बुझी कृत्य पक्रन्छ माथ ॥
जेजे लागोस् क्रियामा अनुचित नहुँदा बोल्नु व्यर्थै बिचारी ।
बाबाआमा रमाऊन् हरदिन घरमा मिल्छ उल्लास भारी ॥२५॥

०००
भक्तपुर