नेपाली हास्यव्यङ्ग्य अनलाइन पत्रिका

अनिता कोइराला :

आकाश पाताल धाएर कुराको मेलो साटौँ
यस्तो उस्तो भन्दै टाउकामा हानौँ
हात खुट्टा बाँधेर अर्काकै कुरा काटौँ !

मिल्ने मिल्ने बसेर मन पेट माझौँ
अरूभन्दा आफूलाई माथि राखौँ
पानीले मात्र किन दूधले नै नुहाऔँ
कम्मर मर्काई मर्काई अरूको उछितो काडौँ

अरूका राम्रा बानी खाल्टामा पुरेर
नराम्रो बानी ओल्टाइ पल्टाई केलाऔँ
पुराना पुराना कुरालाई कलम लगाउँदै सारौँ
हतारमा छु भन्दै
छुसुक्क भए पनि कुरा काटौँ

जागिर नभए पनि पिर छैन अब
आऊ कुरा काट्ने पेशा राम्ररी गरौँ
जागिरै खाएको भए पनि
ढुक्कको सास फेरौँ
शान्ति र आनन्दको सागरमा डुब्न
कुरा काट्ने पेशा पार्टटाइम भए नि गरौँ

सँगै भेट नभएर के भयो र !
मोबाइलमा जुम मिटिङ
गरेर भए पनि अरूकै कुरा काटौँ
कुराकै खेती गरौं कुराकै व्यापार गरौँ
कुराकै समाचारलाई मुख्य बनाऔँ
अनुसन्धान गरेर, प्रतिवेदन तयार पाराैँ
निष्कर्ष निकालेर अरूकै बदख्वाइँमा रमाऔँ

कुराको रहस्यमयी चट्टान फुटाएर
मुखभरी थुक भर्दै मज्जाले हाँसौँ
समयको अमूल्य डोरी कुराकै कैँचीले काटौँ
अरूलाई नङ्ग्याएर आनन्दको पिङ हालौँ
कुराकै काम्रोमा बसेर सोइसोइला खेलौँ
आफूलाई हेर्ने ऎना पर फ्याँकेर
दोषी चस्मा साटासाट गरौँ !
आऊ सँगसँगै बसेर कुरा काटौँ ।

०००
२०८२-२-१७, बिहान ७;२९
काठमाडाैं