नेपाली हास्यव्यङ्ग्य अनलाइन पत्रिका

नवराज कार्की :

१.
अल्छीहरूका आदर्श, उनी गुरू गणेश !
अंग प्रत्यारोपणका उनी, सुरू गणेश !
जसको टाउको छ हात्तीको, वाहन उसैको मुसो
त्यै देखेर भन्दिए कि ? उनलाई गोबर गणेश ?

२.
कारखाना चलाउँदैन, कारखाना बेच्छ
सिमाना जोगाउँदैन सिमाना बेच्छ
बेच्ने कुरा अरू केही भए पो ! बेच्नु ?
आफ्नै युवा हुन् सरकारले दुईचार जना बेच्छ ।

३.
ठ्वास्सै गन्हाउने मदिरा, कसरी पिउने लत बस्छ ?
आफ्नै मुखमा आगो झोसेर, कसरी धूमपानको आदत बस्छ ?
त्यो पनि त त्याग्न सक्छ तर कहिल्यै त्याग्दैन ऊ
जब कसैको दिमागमा, “दले” “झोले” को पद बस्छ ।

४.
आदेश थियो कि शिवजीको फैसला थियो त
समाजले पनि उसलाई यो, हौसला दियो त
सडकमै नबसेर अब कता जावोस् त त्यो साँढे ?
गाईको निम्ति पो ! व्यवस्थित गौशाला थियो त !

५.
अविवाहित नारीलाई सुश्री भन्नु पर्छ
विवाहित जतिलाई श्रीमती भन्नु पर्छ
हाम्रो समाजमा बढ्दै छ पारपाचुके अचेल
सम्बन्ध विच्छेद गरेकीलाई के पार्वती भन्नु पर्छ ?

०००
अमेरिका
स्राेत : बाङ्गा अक्षरकाे बारीबाट सुटुक्क पाेकाे पारी