नेपाली हास्यव्यङ्ग्य अनलाइन पत्रिका

हामीमा आज आशा पलायो
क्रिकेट टोलीले नेपाल धन्न बचायो
कृष्णले मेलम्ची खसाली काठमाडौं पखाले
राधाले नि तिन वर्षमै लोडसेडिङ सक्छिन् अरे
नपत्याए लेखेर राख भन्छिन् रे
त्यस्ता तिन बर्ष कति पटक भन्दै
यता बूढीआमै धुरुधुरु रून्छिन् रे ।

म भन्छु ती आमैलाई
आउला नि आमै आउला
नातिको पालासम्ममा त के नआउला
लौ लौ साँचेर राखौँ तिर्खा सबैले
धित मर्ने गरी खाउँला पिउँला ।

बुढा र भ्रष्ट नेताहरू लागेका छन्
पद जोगाउ अभियानमा
हामी ठिटाहरूको के काम भो र !
रिण काढेरै भए पनि
खाडी मुलुकको अभियानमा
नेपाल त भ्रष्टहरूकै चरन र बिर्ता भो
चुनावको भोट त कठैबरा
कुकुरलाई मासु पैँचो भो
न आयो व्यर्थैको ब्याज,
न त कहिल्यै साउँ फिर्ता भो ।

काठमाडौं