नेपाली हास्यव्यङ्ग्य अनलाइन पत्रिका

चिरञ्जीवी दाहाल :

चोर भन्दा मुख च्यात्लान्, लुटे भन्न पनि हुन्न ।
आगो बाराबार हुँदा, फुटे भन्न पनि हुन्न ॥

इतिहासको धाक दिन्छन्, उता इतिहास रुन्छ
सर्प न्याउरी दोस्ती बन्छन्, जुटे भन्न पनि हुन्न ॥

पार्टी थोत्रो पाटी बन्यो, बास बस्ने ठाउँ छैन
भयो छिन्नभिन्न गुटले, गुटे भन्न पनि हुन्न ॥

खाने वस्तु देख्नै हुन्न, सिन्का पात जुटाउँछन्
खानैलाई त्यो टपरी, खुटे भन्न पनि हुन्न ॥

कुनै हिंस्रक बाघ जस्ता,कुनै छट्टु स्याल बने
जान्दा जान्दै जङ्गलीलाई, बुटे भन्न पनि हुन्न ॥

कस्ता छान्यौं कावाहरू, सधैँ भोकै रहे जस्ता
भुँडी देख्दा खान नपाइ, टुटे भन्न पनि हुन्न ॥

जिब्रो पातमा राखिएला, सत्य बोल्न लाग्यो भने
ज्यानमारा र भ्रष्ट छुट्दा, छुटे भन्न पनि हुन्न ॥

राजनीति कुटनीति, कहिले सिक्ने होला बरा
नेता जस्तै उचाइ छैन, ठुटे भन्न पनि हुन्न ॥

०००
चितवन