नेपाली हास्यव्यङ्ग्य अनलाइन पत्रिका

रमेश समर्थन :

१.
चारैतिर वीभत्स विकृति र विसङ्गतिको पसारो छ
न्यायालय पनि आज क्षुद्र राजनीतिको कमारो छ
लोडसेडिङ भएछ कि त्यहाँ बिजुली नै पुगेको छैन ?
धेरै समय भयो मेरो मनभित्र औंसीको अँध्यारो छ ।

२.
चाहे कसैले खाल्टामा पुरोस् वा आगामा जलाओस्
चाहे चिल गिद्धले खाओस् वा बालुवामा हराओस्
एक पटक नेपाल फर्केर फेरि त्यहीँ जानु परेछ भने
हे पशुपतिनाथ ! मरेपछि मेरो लास पनि नआओस् ।

३.
सकेसम्म मरेर काम गर्छन् बा, तर सन्तानलाई गराउन्नन्
सन्तानसित डराउलान् बरु बा, तर पराईसित डराउन्नन्
सन्तानका निम्ति त्यहाँ पनि निहुरिन, हात पसार्न सक्छ
आफ्ना निम्ति त जहाँ मेरा बा टेक्न पनि मन पराउन्नन् ।

०००
बुटवल