नेपाली हास्यव्यङ्ग्य अनलाइन पत्रिका

कृष्णप्रसाद गौतम :

१.
सम्पन्नताको विकल्प झोली होइन सरकार
आजको काम आजै गर भोलि होइन सरकार
गुलिया चिल्ला प्रसङ्गहरू ललिपप हुन् तिम्रा
विद्रोहको समाधान झन् गोली होइन सरकार !

२.
जति नै पिस्नुहोस् वा घोल्नुहोस् अँगार घुल्य हुँदैन
जति नै धुनुहोस् न गधालाई यो गाईतुल्य हुँदैन
ए हजुर ! यो रक्सीको विज्ञापनले दूध बेच्ने समयमा
हल्लै हल्लाको बजारमा सत्यको कुनै मूल्य हुँदैन ।

३.
आहारकी चरी आशिषले बाँच्दिन चारो चाहिन्छ
प्रार्थानाले मात्र अन्न फल्दैन मित्र ! हतारो चाहिन्छ
भाषणमा त स्वीटजरल्यान्ड नै बनिसक्यो यहाँ
सिकार गर्नलाई अर्जूनदृष्टिको स्पष्ट तारो चाहिन्छ ।

०००
इटहरी, सुनसरी