नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
मुटु चस्काउने महत्वाकाङ्क्षा विषादले रहेछ
आफैभित्रका तृष्णा व्यग्रता र उन्मादले रहेछ
दुनियाँले भनेझैँ त कहाँ जलाउँछ र पिरतीले
सताउने रुवाउने मनमा बसेका यादले रहेछ ।

२.
कटु बचनजस्तो च्वास्स घोच्ने कुनै किलो हुँदैन
मनझैँ पिलिई भित्र भित्रै पाक्ने कुनै पिलो हुँदैन
मनको द्वार ह्वात्तै खोल्दै नखोल्नू बा भन्नुहुन्थ्यो
मान्छेको मन किताब जस्तो पढ्न सजिलो हुँदैन ।

३.
इजाजत नलिएर उहाँसङ्ग भेट मुलाकात नगर्नूस्
चिनेकै भए पनि चुपचाप बस्नू सनाखत नगर्नूस्
जे गर्नुहुन्छ उहाँ गर्न दिनुस् लीला ठान्नुस् प्रभुको
बोल्दै नबोल्नुस् उहाँको विरुद्ध वकालत नगर्नूस् ।

४.
लाग्छ प्रदूषण पनि यहाँ राजनीतिसँगै समाहित छ
यत्रतत्र सर्वत्र राजनीति डुङ्ङ गनाएर दुर्गन्धित छ
सकेसम्म चल्दै नचल्नू चल्नै परे बिचार गरेर चल्नू
उहाँ विरुद्ध चल्न यो बेला बतास पनि निषेधित छ ।

०००
भैरहवा