नेपाली हास्यव्यङ्ग्य अनलाइन पत्रिका

युवराज भण्डारी :

१
अर्ती दिँदा झन् शङ्का गरेर कुरा गर्छन्
शुभेच्छामा उल्टै घृणा छरेर कुरा गर्छन्
साँचो वचन त रत्ती नपच्ने रैछ अहम्लाई –
प्रेमले बोल्दा नि आँखा तरेर कुरा गर्छन् ।

२
कुरा त बुढापाकाको पो मान्नु पर्ने रैछ
फलामलाई तातेकै बेला हान्नु पर्ने रैछ
केही बितिहाल्ने त हैन कुनै ज्ञान नहुँदैमा
बरु थाहा छैन भन्ने चाहिँ जान्नु पर्ने रैछ ।

३
अचेलको फेसन त ‘चिल’ हुन थाल्यो
सूर्य अस्त दुनियाँ टिल हुन थाल्यो
हास्यव्यङ्ग्य झन् किसिम पो हुँदैछ
कमेडी त औधी अश्लील हुन थाल्यो ।

०००
स्राेत : बाङ्गा अक्षरकाे बारीबाट सुटुक्क पाेकाे पारी