नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
मनहरू सिसाझैं चर्किन्छन् भने के लाग्छ
खुट्टा बजार्छन् र फर्किन्छ्न् भने के लाग्छ
जसलाई नजिक ठानियो र प्रतीक्षा गरियो
तेल पानी सरहले तर्किन्छन् भने के लाग्छ ।

२.
माग्नै छ भने झोली जसरी थाप्नुस् अर्थ रहदैन
हावाको आयतन जतिपल्ट नाप्नुस् अर्थ रहदैन
प्रदूषित बनी आफ्नै मुख बिटुलिन सक्छ बरू
दुर्गन्धित सिनोलाई जत्ति सराप्नुस् अर्थ रहदैन ।

३.
कसैको अगेनोमा बलेको आगो तापिएन तापिन्न
लेखियो किन्तु लेखेर पनि केही नापिएन नापिन्न
हात मल्ने र चिल्लो दल्ने बानी परेन माफ गर्नुस्
बिन्तीपत्र हालेर तक्मा पुरस्कार थापिएन थापिन्न ।

४.
एउटाले त्यागेको फेला पारे अर्कोले खोज ठान्छ
कसैले पाखण्ड मानेको वस्तु कसैले ओज मान्छ
दुर्गन्ध र सुगन्धको परिभाषा कसरी लगाउँ हजुर
मान्छेले देखे नाक थुन्छ गिद्धले भेटे भोज खान्छ ।

०००
भैरहवा