नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
प्रीत मिल्दैन रीत मिल्दैन गीत सङ्गीत मिल्दैन
प्रमाणबिना यस्तै हो भनेर गर्न सावित मिल्दैन
दुर्घटना त नियमित यहाँ भइरहन्छन् किन भने
कितावको गणितसङ्ग जीवनको गणित मिल्दैन ।

२.
कोही भोकले कोही जथाभावी खाएर मर्नुपर्छ
बाँच्ने तृष्णामा ग्यास च्याम्बर चियाएर मर्नुपर्छ
महङ्गो होटल सरह रहेछ निजी अस्पताल भन्नु
पैसा नहुनेहरूले जहाँ उपचार नपाएर मर्नुपर्छ ।

३.
यी खञ्चुवाहरूको डाइटमा के के हुन्छ हेर्नुछ
सैतानहरूको ग्याङ्गफाइटमा के के हुन्छ हेर्नुछ
अत्यन्तै घृणित खेल रहेछ राजनीति भन्नू पनि
फ्रस्टेसनको डम्पिङ साइटमा के के हुन्छ हेर्नुछ ।

४.
मुर्दा बाँधेको खटसङ्गै रोगी सुतेको खाट हाँस्छ
शवमाथि बेरिएको पहेंलो रामनामी पाट हाँस्छ
जीवित छँदा जिउँदै मार्ने मरेपछि फूल चढाउने
लर्को हेरेर मान्छेहरूको चिता हाँस्छ घाट हाँस्छ ।

०००
भैरहवा